古代來往東涌同大澳嘅古道—東澳古道

早幾日就有新聞話，為咗對大嶼山有進一步嘅保育，可持續大嶼辦事處已經分階段對呢個地方嘅村落進行考察同研究，希望可以建立一個資訊庫等大家認識一啲地方同文化故事。而講到大嶼山，其中一個好有歷史價值嘅地方，阿史就會諗起「東澳古道」。

東澳古道今時今日可能已經係唔少後生仔女平時放假去行山嘅地方，但呢條由東涌做起點，經過䃟頭、沙螺灣、䃟石灣、深屈呢幾個地方嘅山路，其實响以前係東涌同埋大澳居民出入往來嘅重要通道。

呢條全長十幾公里嘅道路，見證咗唔同年代香港歷史嘅發展。由清朝年間建成嘅大鵬協東涌炮台、東涌灣侯王宮、大澳楊侯古廟等，一路山路就有幾樣重要嘅歷史建築。而除咗呢類比較典型嘅古蹟，東澳古道沿途仲有一條叫做「深石村」嘅聚落，係戰後難民聚居嘅地方，當年嘅南約理民府仲喺呢度為村民提供過農業、畜牧業支援，附近除咗有1902年設立嘅嶼北界碑，仍然留有唔少嘅石碑，記錄當年深石村進行水利工程嘅事跡。如果史友們咁岩行過，仲可以留意下農舍、水池等刻有嘅KAAA字眼，至於點解下篇就再大家講一講。